Dövlət Yol Polisinin əməkdaşları Bakı küçələrində yol hərəkəti qaydalarını pozan piyadalara qarşı reyd keçiriblər. Bu haqda 19 sentyabr tarixində Bakı Şəhər Dövlət Yol Polisi İdarəsinin İctimai qurumlarla əlaqə bölməsinin rəisi Araz Əsgərli məlumat verib.
Reyd paytaxtın 20 Yanvar dairəsində və “Şamaxinka” adlanan ərazisində baş tutub. Yol hərəkəti qaydalarını pozaraq yolu təhlükəli yerdən keçən, eyni zamanda nəqliyyat vasitələrinin hərəkətinə maneə yaradan piyadalarla profilaktik söhbətlər aparılıb, onlara qarşı cərimələr tətbiq olunub.
"Bir daha piyadalara səslənərək bildiririk ki, yolu keçən zaman özünüzü və sürücüləri təhlükə altında qoymamaq üçün keçidlərdən istifadə edin. Qaydaları pozduğunuz halda düşünməyin ki, cərimə ödəməklə məsuliyyətdən yaxa qurtaracaqsınız. Məsuliyyətsizliyiniz həyatınızın sona çatması ilə də nəticələnə bilər", - deyə Araz Əsgərli bildirib.
