3 noyabr tarixində Bakıda "Zəfər günün mübarək" adlı konsert təşkil ediləcək. Tədbir Kamera və orqan musiqi zalında Mədəniyyət və Təhsil nazirliklərinin dəstəyi ilə Azərbaycan Dövlət Akademik Filarmoniyasının "Gənclərə dəstək" layihəsi çərçivəsində saat 18:00-da keçiriləcək.
Bakı Şəhər Mədəniyyət Baş idarəsinin verdiyi məlumata əsasən, konsertdə Azərbaycan Milli Konservatoriyası nəzdində İncəsənət Gimnaziyasının xoru (bədii rəhbər-Validə Cəlilova) çıxış edəcək.
Musiqili proqramda tanınmış bəstəkarların əsərləri ilə yanaşı, gənc müəllif Vəfa Bağırzadənin əsəri də səsləndiriləcək.
5 illiyini qeyd edən “Gənclərə dəstək” layihəsi Azərbaycan Dövlət Akademik Filarmoniyasının direktoru, Xalq artisti, professor, tanınmış piano ifaçısı Murad Adıgözəlzadə, musiqişünas Ayla Kərimova-Zəkəriyyənin təşəbbüsü və Mədəniyyət Nazirliyinin dəstəyi ilə 2016-cı ildə yaradılıb.
Ötən gün “Zəfər günü”nə həsr olunmuş tədbirlər çərçivəsində “Qarabağ Azərbaycandır!” adlı konsert proqramının keçirilməsi haqda məlumat vermişdik.
