Bakıda səs yazısı yayılan məktəb direktoruna şiddətli töhmət verilib. Bu haqda 1 oktyabr tarixində Bakuplus.az məlumat verir.
Bakı şəhəri 45 nömrəli tam orta məktəbin direktoru Nəcibə Axundovaya şiddətli töhmət verilib.
Belə ki, həmin direktorun səs yazıları yayılmışdır. O, səs yazısında məktəbə qəbul edilən şagirdlərin valideynlərindən pul tələb edib. Həmçinin Axundova sinif rəhbərliyi verilən müəllimlərdən də 1000 manat pul istəyib. Direktor hətta müəllimləri də təhqir etməkdən çəkinmir. Məktəbin müəllimlərindən biri direktorun təzyiqindən intihar həddinə çatdığını da qeyd edib.
Müəllimlərin müraciəti əsasında Bakı Şəhəri üzrə Təhsil İdarəsi tərəfindən müvafiq araşdırma aparılıb. Araşdırma nəticəsində təhsil müəssisəsinin rəhbəri Nəcibə Axundovaya Əmək Məcəlləsinin 186-cı maddəsinin 2-ci hissəsinə əsasən, intizam tənbehi kimi sonuncu xəbərdarlıqla şiddətli töhmət verilib.
Nəcibə Axundova 2016-cı il aprelin 18-i Lələtəpədə minaya düşərək şəhid olan polkovnik-leytenant Sənan Axundovun həyat yoldaşıdır. O, cari ildə 8 Mart - Beynəlxalq Qadınlar Günü münasibətilə “Tərəqqi” medalı ilə təltif edilmişdir.
Axundova hazırda səhhəti ilə əlaqədar müvəqqəti olaraq işə çıxmır.
Onun müalicədən sonra iş yerinin dəyişdirilməsi gözlənilir.
