Bu ildən etibarən Bakı şəhərindəki lisey və gimnaziyalara məktəblilərin qəbulu qaydaları dəyişir. Bu haqda bu gün, 27 oktyabr tarixində Elm və Təhsil Nazirliyinin sektor müdiri Fuad Qarayeva istinadən Qafqazinfo məlumat verib.
Dəyişikliklərin ən əsası liseylərə və gimnaziyalara qəbul imtahanlarında məntiq fənninin ləğv edilməsidir. İmtahan tədris dili və riyaziyyat fənləri üzrə aparılacaq. Məktəbdə məntiq fənni ayrıca tədris olunmadığından, şagird əlavə dərslərə getməli olduğundan məktəblilərin valideynləri narazılıqlarını bildiriblər.
“Artıq 4, 5, 6 və 7-ci sinifdə oxuyanlar lisey və gimnaziyalara imtahanda iştirak edə biləcəklər. Respublika fənn olimpiadalarında və beynəlxalq olimpiadalarda yer tutan yuxarı sinif şagirdləri bu gimnaziyalara imtahandankənar yerləşdirilə bilərlər. Liseylərdə Azərbaycan bölməsində təhsil alan şagird rus bölməsinə keçə bilməz. Amma rus bölməsində oxuyan şagird, arzu edərsə, Azərbaycan bölməsində də təhsilini davam etdirə biləcək. Qəbul imtahanlarının isə iyun ayında keçirilməsi planlaşdırılır”, - deyə nazirliyin rəsmisi məlumat verib.
O, həmçinin qeyd edib ki, gələcəkdə ölkənin bütün lisey və gimnaziyalarına qəbul mərkəzləşdirilmiş qaydada aparılacaq. Yəni rayonda təhsil alan şagird topladığı baldan asılı olaraq Bakıdakı liseylərdə və gimnaziyalarda təhsil almağa gələ bilər.
