Bakı sakini Mübariz Qədirli 1 aya yaxındır ki, övladını qeydiyyata almaq üçün yaşadığı rayonda uşaq bağçası tapa bilmir. Sistem ona evindən uzaqda olan uşaq bağçalarını göstərir. Bu haqda 29 avqust tarixində Xəzər Xəbər reportaj çəkib.
“Mən uşağı bağçaya yazdırmaq üçün sistemə girdim, lakin ərazimizdə olan bağça qeydiyyatda görünmədi. Bizim evin yanında 215 saylı bağça var, onu hələ sistemdə görmürük. “Gənclik” metrosu ərazisində yaşamağıma baxmayaraq, sistem mənə uşağı “Koroğlu” və ya “Qara Qarayev” metrosu istiqamətindəki uşaq bağçalarından birinə yazdırmağı təklif edir”.
Şikayətçi bildirir ki, uşağı sistemdə olan bağçaların birindən qeydiyyatdan keçirsə, indi də başqa problemlə qarşılaşacaq: “Orada qeydiyyatdan keçsəm də, uşaq bağça ərazisində yaşamadığımız üçün sistemdə ləğv olunacaq. Evin yaxınlığında uşaq bağçası varsa, niyə evdən uzaqda qeyd etməliyəm?”
Məsələ ilə bağlı Elm və Təhsil Nazirliyindən bildirildi ki, ərazi üzrə bağçaların sistemdə görünməməsinin əsas səbəbi o bağçada həmin yaş üzrə və bölmə üzrə qrupun olmaması və növbəyə yazılma limitinin dolmasıdır. Vətəndaşların yaşadıqları ərazidən uzaqda yerləşən uşaq bağçalarını seçə bilməməsi məsələsinə gəlincə bildirilib ki, vətəndaşlar övladlarını istənilən bağçaya verə bilərlər. Burada heç bir məhdudiyyət yoxdur. Hər bir vətəndaşın 3 bağı seçmək imkanı var.
