Paytaxt sakinləri avtobusların sayından narazıdırlar. Bu haqda 3 oktyabr tarixində Bakuplus.az İctimaiTV-yə istinadən xəbər verir.
Yaranmış nəqliyyat problemi əhalini narahat edir. Onlar evdən şəhərə və əksinə getmək üçün böyük çətinliklərlə üzləşirlər. Sakinlər avtobusların yararsızlığı ilə yanaşı, onların normal hərəkət qrafikinin olmaması, həmçinin xətdə olan avtobusların sayının azlığından da şikayətlənirlər.
“Mən 17 nömrəli avtobusla işə gedirəm. Yasamalda, demək olar ki, ən pis marşrutdur. Yarım saatdan tez gəlmir. Axşam saat 9-dan sonra Koroğlu heykəlinin yanından gəlmək üçün 40 dəqiqə, bəzən hətta bir saat avtobus gözləməli oluram. Buna görə də o vaxta dayanacaqda çox sayda adam yığılır və basa-basda qayıtmalı oluruq”, - sərnişinlərdən biri şikayətini bildirib.
Sakinlər aidiyyəti qurumlardan avtobusların sayının artırılmasını, intervalın azaldılmasını və köhnə nəqliyyat vasitələrinin yeniləri ilə əvəz olunmasını istəyirlər.
