Bakı-Sumqayıt-Bakı sürət elektrik qatarlarında gedişhaqqının “Mastercard” beynəlxalq ödəniş sisteminə məxsus kartlarla ödənilməsi dayandırılıb. Bu haqda BakuPlus.az Report-a istinadən bu gün, 8 noyabr tarixində xəbər verir.
Kartla ödəniş etməyə çalışan sərnişinlərə “Azərbaycan Dəmir Yolları” QSC-nin (ADY) əməkdaşları bununla bağlı xəbərdarlıq edib.
Məhdudiyyət noyabrın 4-dən qüvvəyə minib və nə zaman aradan qaldırılacağı bilinmir.
ADY-nin Çağrı mərkəzi “Mastercard” vasitəsilə birbaşa, eləcə də "Apple Pay” və “Google Pay” üzərindən ödəniş etməməyi tövsiyə edib:
“Biz, ümumiyyətlə, “Apple Pay” və “Google Pay”-ə rəsmi olaraq zəmanət vermirik. Yalnız kart ilə ödəniş etməyi tövsiyə edirik. Hazırda isə “Mastercard” kartları, “Apple Pay” və “Google Pay” cihazları ilə ödəniş edərkən turniket açılmayacaq. Problem var və onun aradan qaldırılması üçün işlər aparılır”.
“Mastercard” şirkətindən bildirilib ki, problemin aradan qaldırılması üçün banklarla işlər aparılır: “ADY-yə məxsus qatarlarda bank kartı ödənişlərinin qəbulu ilə bağlı bəzi qısamüddətli NFC problemlərinin olduğundan xəbərdarıq. Onları aradan qaldırmaq üçün banklarla yaxın təmasdayıq”.
