Bakının Binəqədi rayonu, 7-ci mikrorayon, Abay Kunanbayev küçəsi, 3 ünvanında binanın qarşısındakı asfalt örtüyü dağınıq vəziyyətdədir. Bu haqda bu gün, 29 avqust tarixində Oxu.az məlumat verib.
Sakinlərin sözlərinə görə, 1983-cü ildə binanın tikintisindən sonra yol yenilənməyib.
Yerli sakinlər 2 il əvvəl Binəqədi Rayon İcra Hakimiyyətinə (RİH) müraciət ediblər. Nəticədə blokların qarşısında asfalt örtüyü dəyişilib, əsas avtomobil yolu isə əvvəlki vəziyyətdə qalıb.
“Təkrar müraciət etdikdə ərazinin onların balansında olmadığını, sadəcə bizə dəstək üçün asfalt örtüyü göndərdiklərini bildirdilər. Sonra bizi Bakı Şəhər Mənzil Kommunal Təsərrüfat Departamentinə yönəltdilər. Oraya müraciət etdikdə isə bizə: “2020-ci ilin siyahısı tərtib olunub, 2021-ci ilin titul siyahısı tərtib olunanda, sizin ünvan abadlaşma üçün qeyd olunacaq”, - deyə cavab verildi”, - deyə sakinlər bildirdi. Lakin o vaxtdan heç bir tədbir görülməyib.
Onlar, həmçinin qeyd edirlər ki, bina ilə üzbəüz yerləşən 2 saylı evin həyəti artıq asfaltlanıb. Sakinlər iddia edirlər ki, bu binanın qarşısında musiqi məktəbi, aşağı hissədə isə 158 saylı uşaq bağçası olduğu üçün asfalt örtüyü daha əvvəl dəyişdirilib.
Binəqədi Rayon İcra Hakimiyyətindən məsələnin araşdırıldığı bildirilib.
