Bakının Binəqədi rayonu, Biləcəri qəsəbəsi, Məlik Aslanov küçəsi, döngə 1 adlanan ərazidə illərdir ki, burada yaşayan 300-dən çox ailə yolların təmirsiz olduğundan şikayət edir. Bu haqda Real TV bu gün, 3 sentyabr tarixində reportaj hazırlayıb.
Sözügedən ünvanın ətrafındakı yolların bir hissəsi keçmişdə asfaltlanıb. Lakin sözügedən ərazidə yaşayanların sözlərinə görə, küçədə heç bir bərpa işləri aparılmayıb. Vəziyyətin dözülməzliyinə etiraz edən sakinlər bu barədə aidiyyəti qurumlara dəfələrlə rəsmi şəkildə şikayət ünvanlayıblar. Lakin müraciətlər heç bir nəticə verməyib.
Sakin Kəmaləddin Mehdiyevin dediyinə görə, yollar bundan da bərbad vəziyyətdə olub. Lakin burada yaşayanlar öz vəsaitləri hesabına yolu nisbətən düzəltməyə çalışıblar.
2014-cü ildən burada sakin olan Nailə xanım deyir ki, bu problem ən çox fiziki məhdudiyyəti olan şəxslərin yaşayışını çətinləşdirir.
Tək qayğıları oyun oynamaq və təhsil almaq olan uşaqlar da yolların vəziyyətindən şikayətçidirlər.
Şikayətlər barədə Binəqədi Rayon İcra Hakimiyyətindən bildirdilər ki, RİH tərəfindən aidiyyəti üzrə Azərbaycan Avtomobil Yolları Dövlət Agentliyinə (AAYDA) asfalt örtüyünün yenidən qurulması və təmir işləri ilə əlaqədar rəsmi müraciət edilib. AAYDA öz növbəsində bildirdi ki, sözügedən yolun növbəti investisiya proqramlarına uyğun olaraq təmiri nəzərdə tutulub.
