“Binə” ticarət mərkəzi - Ələt qəsəbəsi marşrutu ilə hərəkət edən 195 saylı avtobusun sürücüləri sərnişin daşımaqdan imtina ediblər. Onlar avtobusları xətdən çıxarıb bir neçə gün qarajda saxlayırlar. Buna səbəb digər mikroavtobusların sərnişinləri eyni istiqamətdə qeyri-qanuni daşımalarıdır. Bu haqda Xəzər Xəbər 2 oktyabr tarixində reportaj hazırlayıb.
Marşrut avtobuslarının sürücüləri həmin istiqamətdə 30-a yaxın qanunsuz mikroavtobusun hərəkət etdiyini iddia edirlər. Mikroavtobus sürücüləri onların qanuni fəaliyyətinə müdaxilə edərək sərnişinlər üçün təhlükə yaradırlar. Onlar, həmçinin qeyd edirlər ki, bəzi mikroavtobus sürücülərinin sürücülük vəsiqəsi belə yoxdur.
Nəqliyyat şirkətinin direktor müavini Mövsüm Kərimov deyir ki, xətdə 10 avtobus var. Bu avtobuslar 15 dəqiqəlik intervalla sərnişin daşıyır. Hazırda onların sərnişinləri qanunsuz fəaliyyət göstərən mikroavtobuslarla daşınırlar. Ona görə də artıq bir neçə gündür ki, zərərlə işləyirlər. Şirkət hazırda vergiləri və maaşları ödəməkdə çətinlik çəkir. Bu səbəbdən sürücülər xəttə çıxmaqdan imtina edirlər. O, bununla bağlı aidiyyəti qurumlarla əlaqə saxladıqlarını da deyir.
Bakı Nəqliyyat Agentliyindən verilən məlumata görə, Lökbatan dairəsində qeyri-qanuni sərnişindaşımaların olması və yaranan çaşqınlıq 195 saylı avtobusların fəaliyyətinə mənfi təsir göstərir. Qeyri-qanuni sərnişindaşıma hallarının qarşısının alınması üçün agentlik aidiyyəti qurumlara bir neçə dəfə müraciət etsə də, müsbət dəyişiklik olmayıb. Həmçinin məlumat verilib ki, 195 nömrəli avtobusların normal fəaliyyətinin təşkili üçün müvafiq tədbirlər görülür.
