Daxili İşlər Nazirliyi “Torqovaya” adlanan yerdə “siçan” obrazında fəaliyyət göstərən şəxsin saxlanılması və məhkəmə tərəfindən cərimələnməsinə münasibət bildirib. Bu haqda 29 sentyabr tarixində Qafqazinfo.az məlumat verib.
Nazirliyin Mətbuat xidmətinin əməkdaşı Nurlan Əliyev açıqlamasında bildirib ki, saxlanılan şəxsin fəaliyyətinin məhdudlaşdırılması qanunla tənzimlənir:
“Küçədə hansısa ödəniş müqabilində lisenziyalaşdırılmayan fəaliyyət qanunsuz hesab edildiyi üçün inzibati xəta küçə ticarətinin tərkib əlamətlərini yaradır. Səbail rayonu, Nizami küçəsində qanunsuz fəaliyyət göstərən şəxsə bu əməllə bağlı dəfələrlə edilən xəbərdarlıqlara, iradlara məhəl qoymadığı, həmçinin müvafiq polis orqanına dəvət edilən zaman polisin qanuni tələbinə qəsdən tabe olmadığı üçün barəsində inzibati tənbeh tədbiri tətbiq olunub”.
33 yaşlı şəxs barəsində tərtib edilmiş protokola əsasən, o, Səbail Rayon Məhkəməsinin qərarı ilə 200 manat cərimələnərək sərbəst buraxılıb.
