Bakıda həkimi talayan sürücüyə hökm oxunub. Bu haqda 5 oktyabr tarixində Qafqazinfo məlumat verib.
Belə ki, “Dünyagöz” klinikasının cərrah-oftalmoloqu Mehmet Şeref Öğretmenoğlunun sürücüsü Elşən Süleymanov (soyad şərtidir) 2021-ci ildə dəfələrlə həkimin evinə daxil olaraq onu qarət edib. O, evdən hissə-hissə ümumilikdə 12 min manata yaxın pul oğurlayıb.
Oğurluqlara rəğmən, həkim ilk baxışda Elşəndən şübhələnməyib. Belə ki, bir müddət sonra Mehmet Şeref Öğretmenoğlu Azərbaycana gələn həyat yoldaşı ilə birlikdə dincəlmək üçün Qubaya yollanıb. Növbəti gün Bakıya qayıtdıqdan sonra o, Elşənə zəng edərək işə aparması üçün dalınca gəlməyi tapşırıb. Elşən isə həkimin dediyini yerinə yetirməyib, daha sonra isə telefonunu söndürüb.
Elşənin davranışlarından şübhələnən M.Şeref polisə evindən oğurluq edilməsi ilə bağlı şikayət edib.
Elşən bu ilin mart ayında tutularaq istintaqa təhvil verilib. Təqsirləndirilən şəxs məhkəmədə ona elan olunmuş ittihamda özünü təqsirli bilib və ona 2 il 11 ay 24 gün müddətinə azadlığın məhdudlaşdırılması cəzası təyin edilib.
