Zərərçəkən şagird məktəbdən mediaya verilən, guya onu döyən sinif yoldaşı ilə barışma məlumatını təkzib edib. Bu haqda 7 oktyabr tarixində Bakuplus.az Realtv-yə istinadən xəbər verir.
Həmçinin bildirib ki, onu döyən və bunu telefona çəkərək paylaşan sinif yoldaşlarının hər ikisi bir həftədir ki, dərsə gəlmir. Hadisə ilə bağlı açıqlama verən zərərçəkən şagirdin atası bildirdi ki, videonu izləyərkən gördüklərindən dəhşətə gəlib və dərhal polisə müraciət edib. Oğlunun səhhətində hər hansı bir problemin olduğu barədə məktəbdən verilən məlumat isə həqiqəti əks etdirmir.
“Biz barışmamışıq, barışmaq fikrimiz də yoxdur. Ən azından mən istəyirəm ki, o məktəbdə təlim-tərbiyəyə dərs olsun. Uşaqlar getsin, sakit gəlsin, dərs oxusun. Ora xuliqanxana olub. Böyük uşaqlar balacalardan pul yığır, siqaret çəkirlər. Nizam-intizam yoxdur məktəbdə. Bir də istəyim odur ki, o müəlliməni ən azından yoxlasınlar, görsünlər, o, haranısa qurtarıb, onun savadı var, ya yox. Niyə o, belə şeyləri ört-basdır etmək istəyir?”, - məktəblinin atas Namiq Zeynalov bildirib.
Namiq Zeynalov əlavə edib ki, dəyən xəsarətin dərəcəsini müəyyənləşdirmək üçün tibbi ekspertiza təyin olunub.
Hazırda faktla bağlı müvafiq qurumda araşdırma aparılır.
