Milli məclisin deputatı Fatma Yıldırım məşhur Hollivud aktrisası Ancelina Coli ilə olan oxşarlığından danışıb. Bu haqda məlumatı Bakuplus bu gün, 19 sentyabr tarixində verir.
Belə ki, 93 saylı Bərdə şəhər dairəsindən olan deputat seçicilərinin onu Ancelina Coliyə oxşatdığını bildirib: “Bərdə rayonuna gedən zaman hər kəs məni Ancelina deyə çağırır. Bir millət vəkili kimi çox şadam ki, seçicilərim mənə bu qədər dəyər verir. Bu gün bu qədər gənc qalmağımı seçicilərimə borcluyam”.
Qeyd edək ki, Fatma Yıldırım 12 yanvar 1974-cü ildə Bakıda fizika-riyaziyyat elmləri doktoru, professor Vidadi Əliyevin ailəsində anadan olub.
O, fizika-riyaziyyat elmləri üzrə fəlsəfə doktoru, Milli Məclisin Elm və Təhsil Komitəsinin, habelə Təbii ehtiyatlar, Energetika və Ekologiya Komitəsinin üzvü, Belçika, Çexiya, İsrail, İtaliya, Qazaxıstan, Latviya, Niderland, Özbəkistan, Rusiya, Səudiyyə Ərəbistanı, Türkiyə parlamentləri ilə əlaqələr üzrə işçi qruplarının və GUAM-ın Parlament Assambleyasında Azərbaycan nümayəndə heyətinin üzvüdür.
