Ermənistan silahlı qüvvələrinin təxribatı nəticəsində həlak olan Azərbaycan ordusunun hərbi qulluqçusu Fərid Mehbalı Bakının Yasamal rayonundakı İkinci Şəhidlər Xiyabanında dəfn edilib. Bu haqda bu gün, 14 sentyabr tarixində Bakuplus.az məlumat verir.
Dövlət Sərhəd Xidmətinin (DSX) 28 yaşlı kapitanı Fərid Mehbalı Milli Məclisin deputatı, Həmkarlar ittifaqının sədri Səttar Mehbalıyevin yaxın qohumu idi. Dəfn mərasimində iştirak edən deputat onun ailədə beşinci şəhid olduğunu bildirib. “Vətəni canla, qanla qorumaq lazımdır. Fərid qardaşı ilə birgə Vətən müharibəsində də iştirak edib. Xüsusi təyinatlılarda xidmət edirdi. Bütün şəhidlər bizim namusumuz, qeyrətimizdir”, - deyə o qeyd edib.
Dəfn mərasimində Azərbaycan Müdafiə Nazirliyinin rəsmiləri, Yasamal rayon İcra Hakimiyyətinin rəhbərliyi və ictimaiyyət nümayəndələri iştirak ediblər.
