Şəhid Səbuhi Əhmədovun qardaşı danışıb. Bu haqda 14 sentyabr tarixində Report məlumat verib.
"Səhər qardaşıma zəng etdim, telefonu başqa şəxs açdı və qardaşımın qisasının alındığını dedi", - bu sözləri şəhid Səbuhi Əhmədovun qardaşı Sənan Əhmədov bildirib.
O qeyd edib ki, qardaşı və özü körpə olanda valideynləri vəfat ediblər, onlar SOS kəndində böyüyüblər:
"Gizir idi. Hərbiyə gedəndə həmişə deyirdi ki, "mənimlə fəxr edəcəksən". Dediyini edərdi. Üç gün əvvəl zəng etmişdi. Düşmən tərəfdə atışma olduğunu dedi. Səhəri günü danışdıq. Dünən artıq qardaşım şəhid oldu. Mənim üçün onun itkisi nə qədər çətin olsa da, qardaşımla fəxr edirəm".
Sənan Əhmədovun sözlərinə görə, qardaşı hərbçi yoldaşının qabağına keçərək şəhid olub:
“Qardaşımı gözümlə görməmiş inanmadım odur. Onu götürməyə gedənə qədər dua edirdim ki, yalan olsun. Arzusu var idi ki, evi olsun, ailəsi olsun. Çox sıxılırdı ki, bu məsələləri yoluna qoya bilmir. Mənə deyirdi ki, qardaş, məni nə vaxt evləndirəcəksən? Qardaşımın bədəninə 14 güllə dəyib. Hərbçi yoldaşının qabağına keçərək şəhid olub”.
Şəhid Səbuhi Əhmədov Vətən müharibəsində iştirak edib, dörd medalla təltif olunub.
[URIS id=69827]
