Bakının Yasamal rayonunda 49 yaşlı Sevil adlı qadın 15 gündür ki, küçədə qalır. Bu haqda bu gün, 7 yanvar tarixində Oxu.az məlumat verib.
Qonşular qadına yeməklə kömək etməyə çalışsalar da, əsas problemin mənzil tapmaq olduğunu bildiriblər. Qadının səhhətinin yaxşı olmadığı, gecələr soyuğa dözə bilmədiyi də bildirilir.
Bəzi məlumatlara görə, qadının əvvəllər yaşadığı ev satılıb və bunun müqabilində ona müəyyən məbləğ ödənilib. Amma sonradan vəziyyətin necə olduğu məlum deyil. Eyni zamanda bildirilib ki, qadın sığınacağa yerləşdirilməkdən imtina edib və ona mənzil verilməsi üçün kömək istəyib. Bu isə insanlar tərəfindən birmənalı qarşılanmayıb.
Sosial Xidmətlər Agentliyinin rəsmisi bildirib ki, qadın öz istəyi ilə evini tərk edib: “Çətin həyat şəraitində, küçədə yaşadığı qeyd olunan Sevil İbrahimovanın sosial xidmətə tələbatının qiymətləndirilməsi aparılıb. Vətəndaşın bacısının əməkdaşımıza verdiyi məlumata əsasən, S.İbrahimova narkotik vasitə aludəçisidir, evini və övladlarını da bu səbəbdən tərk edib”.
Agentlik tərəfindən də qadın aidiyyəti üzrə dispanserə yerləşdirilməsi təklifindən imtina edib.
