Tədris ilinin başlanmasına 10 gün vaxt qalır. Regionlarda yaşayan tələbələr sentyabrın 15-nə kimi paytaxtda münasib qiymətə ev tapmağa çalışırlar. Evlər baha olan təqdirdə isə bəziləri tələbə yataqxanalarına üz tutur. ATV Xəbər Bakıdakı universitetlərin yataqxanalarında yerləşmə qiymətlərini öyrənib. Bu haqda bu gün, 5 sentyabr tarixində Bakuplus.az məlumat verir.
Regionlarda yaşayan tələbələrin paytaxta üz tutması kirayə verilən evlərin qiymətinin artmasına səbəb olub. Amma bu süni qiymət artımının qarşısını almaq üçün alternativ kimi yataqxanalar yaradılıb. Əgər 2-3 il bundan öncə bu yataqxanaların azlığından şikayət olunurdusa, indi vəziyyət xeyli dəyişib.
Tələbə yataqxanalarının qiyməti şəraitinə görə dəyişir. Bakı Dövlət Universitetinin yeni istifadəyə verilən 5 mərtəbəli 220 nəfərlik tələbə yataqxanası camaşırxana, internet, oxu zalı, idman sahəsi, tibb məntəqəsi və sair şəraitlə təmin olunub. Bir nəfər üçün aylıq ödəniş 75 manatdır.
Azərbaycan Tibb Universitetinin (ATU) isə 5 yataqxanası fəaliyyat göstərir. Onlardan 3 saylı yataqxana əsaslı təmir olunur. Ümumilikdə yataqxana 980 nəfərlikdir. Yataqxana haqqı bir nəfər üçün binada olan şəraitdən və otağın tutumundan asılı olaraq, 50 və 80 manat arasında dəyişir.
Bakı Avrasiya Universitetinin yeni yataqxana binası tikilərək istifadəyə verilib. Yataqxana 82 çarpayılıqdır, 18 otaqdan ibarətdir. Otaqlar 2, 4 və 6 nəfər üçün nəzərdə tutulub. Qiymətlər bir nəfərə görə 120, 130, 150 manat civarında nəzərdə tutulub. Qeydiyyat avqustun 1-dən başlayıb.
Bütün yataqxanalarda, əsasən, şəhid və qazi övladlarına, valideynlərini itirmiş, sosial həssas qrupuna daxil olan ailələrin övladlarına üstünlük veriləcək və onlara güzəştlər olunacaq.
