Məhkəmənin qərarı ilə Azərbaycan Həmkarlar İttifaqlarının İdman Təşkilatları Assosiasiyasının sədri Nadir Əliyev və Yasamal idman-sağlamlıq klubunun direktoru Alik Həsənov həbs ediliblər. Bu haqda bu gün, 17 avqust tarixində Baş Prokurorluğa istinadən Bakuplus.az məlumat verir.
Baş Prokurorluğun verdiyi məlumata görə, onlar Yasamal idman klubunun tabeliyində olan “Məhsul” stadionunu satmaq adı ilə ayrı-ayrı iş adamlarının pullarını mənimsəməkdə ittiham olunurlar.
Məlumata görə, Nadir Əliyev və Alik Həsənov fərdi sahibkarlara stadionun 1,25 hektar ərazisini hündürmərtəbəli binanın tikintisi üçün 5.500.000 manata sata biləcəklərini bildiriblər. Nadir Əliyev və Alik Həsənovun qurumun vəzifəli şəxslərinə rüşvət vermək adı ilə sahibkarların 900.000 manat pulunu mənimsəmələri üzə çıxıbç
İstintaq zamanı müəyyən edilib ki, Alik Həsənov Yasamal idman-sağlamlıq klubunun sədri olarkən stadionu 8 milyon manata satmaq üçün aidiyyəti vəzifəli şəxslərə rüşvət vermək adı ilə başqa bir sahibkardan 360.000 manat pul alıb.
