Bakının Xətai rayonu, Əhmədli qəsəbəsində məktəblinin ölümü ilə nəticələnən yol-nəqliyyat hadisəsi yerində lentə alınan kadrlar cəmiyyətdə geniş müzakirələrə səbəb olub. Bildirilir ki, həmin ərazidə çaşqınlıq yaradan yol nişanları var. Bu haqda bu gün, 12 yanvar tarixində Oxu.az məlumat verib.
Maraqlı məqamlardan biri bu yolda nəqliyyatın hərəkətinin yalnız sol və sağ tərəfdən olduğunu göstərən nişanların olmasıdır. Digər məsələ isə ondan ibarətdir ki, hadisə yerində avtobuslar üçün zolaqların olmasına baxmayaraq, bu yolun əvvəlində “Giriş qadağandır” nişanı var.
Məsələ ilə bağlı Bakı Nəqliyyat Agentliyinin (BNA) Yol Hərəkətinin Təşkili şöbəsinin müdiri Tərlan Səfərov açıqlama verib.
“Belə ki, avtobus öz sxemi üzrə hərəkətini davam etdirib. Həmin kəsişməyə çatmamış yolda məcburi hərəkət istiqaməti nişanlarına aid olan 4.1.6 yol nişanı var. Bu nişan sola və sağa hərəkəti məcburi edir. Bu nişanın tələbi müntəzəm sərnişindaşıma xidməti göstərən avtobuslara aid edilmir. Bu, qanunun tələbidir.
Lakin düz qeyd edirsiniz ki, həmin yolda 3.1 (Giriş qadağandır) qadağanedici nişanı olmamalıdır. Biz artıq bununla bağlı Baş Dövlət Yol Polisi İdarəsi (BDYPİ) ilə müzakirələr aparmışıq. Həmin nişan 3.2 (Hərəkət qadağandır) nişanı ilə əvəz ediləcək”, - deyə BNA-nın rəsmisi bildirib.
