Xalq yazıçısı Çingiz Abdullayev Azərbaycan Yazıçılar Birliyinin (AYB) XIII qurultayının xərcləri ilə bağlı jurnalistin sualını yersiz hesab edib. Bu haqda bu gün, 27 oktyabr tarixində Baku TV məlumat verib.
“Mənim kimi birisinə o sualı vermək yersiz idi. Mən pul xərcləyən, onu bölüşdürən deyiləm. Ona görə də dediklərimdən peşman deyiləm. Bəli, o sualı verən jurnalist utanmalı idi. Mən sözümün üstündə dayanıram”, - deyə Abdullayev jurnalistləri təhqir etdiyinə görə peşman olmadığını bildirib.
Daha öncə AYB-nin qurultayına 203 min manat vəsaitin xərclənməsi ilə bağlı ona sual verən jurnalistə “Niyə ölmürsən, utanmırsan?” deyə cavab verib. Bu açıqlama ilə bağlı sosial şəbəkələrdə və mətbuatda Çingiz Abdullayevin ünvanına sərt ittihamlar səsləndirilib.
35 ildir quruma sədrlik edən yazıçı Anar yenidən 5 il müddətinə sədr seçilib. Onun bu vəzifəyə təkrar seçilməsi bəzi namizədlərin narazılığına səbəb olub.
