Bakıda 132 saylı marşrut avtobusunun sürücüsü ictimai nəqliyyatın şüşələrinə şəffaflığı məhdudlaşdıran örtüklər (plyonka) çəkib. Bu haqda bu gün, 26 sentyabr tarixində Bizim.Media məlumat verib.
Metronun “Əhmədli” stansiyası - Hövsan kəndi istiqamətində hərəkət edən marşrutdan müntəzəm istifadə edən bir neçə sərnişin məsələ ilə bağlı müraciət edib.
Sərnişinlərin şikayətlərinə görə, bu plyonkalar baxış sahəsini məhdudlaşdırır, şüşələrin şəffaflığını məhdudlaşdırır və hər hansı şəkildə avtomobilin idarə olunmasına mane olur. Dayanacaqda həmin marşrutu gözləyən sərnişinlər üçün də qeyri-müəyyənlik yaranır. Avtobusa minmək istəyən sərnişinlər plyonkaya görə salonun dolu və ya boş olduğunu görə bilmirlər.
Məsələ ilə bağlı Bakı Nəqliyyat Agentliyinin (BNA) mətbuat katibi Mais Ağayev bildirdi ki, problem aydınlaşdırıldıqdan sonra açıqlama veriləcək.
Sürücünün sol və sağ əlinin altındakı şüşələrin şəffaflığı ilə bağlı beynəlxalq standartlara əsasən müəyyən edilib ki, ön şüşə ən azı 75 faiz, ön yan şüşələr isə ən azı 70 faiz şəffaf olmalıdır. Ön alın və ön yan pəncərələrdə heç bir pərdə və jalüzlərdən söhbət gedə bilməz.
