Videobloger Nail Kəmərli Biləcəri qəsəbəsində narkotik satışı və istifadə olunmasının getdikcə çoxalmasından bezən sakinlərin şikayətləri haqda süjet çəkib. Bu haqda bu gün, 29 avqust tarixində Bakuplus.az məlumat verir.
Oğlu 12 ildir narkotik aludəçisi olan Aytən xanım bütün bu müddət ərzində təkcə övladının həyatı üçün deyil, ümumilikdə yaşadığı qəsəbədə narkotikin yayılması ilə mübarizə aparmağa çalışır.
O, videoda qeyd edir ki, oğluna qanunsuz narkotik satan şəxslərin yanına dəfələrlə göz yaşları içində gedib, onlardan bu işdən əl çəkmələrini xahiş etsə də, bu, heç bir nəticə verməyib.
Qəsəbə sakinlərindən biri qeyd edib ki, küçədə narkotikin açıq-aşkar satıldığına görə uşaqlarını gəzməyə buraxmağa qorxur. Qonşuluqda yaşayan insanlar da həmin faktı təsdiqləyib.
Bir müddət əvvəl Nail Kəmərli “Papanin”dən olan narkotik alverçiləri və narkomanları haqqında rezonanslı süjet çəkib. Bundan sonra polis reydi keçirilib və narkotik vasitələrin satışı ilə məşğul olan şəxslər saxlanılıb.
