Uşaqlıqda valideyn himayəsindən məhrum olmuş və internat məktəbini bitirən qardaşlar dövlətdən onların mənzillə təmin olunmasını xahiş edirlər. Bu haqda bu gün, 7 sentyabr tarixində Bakuplus.az Real TV-yə istinadən məlumat verir.
Səməd və Elməddin Mirzəliyevlər valideynləri tərəfindən 10 yaşında tərk edilərək ailələri tərəfindən Buzovnada yerləşən 13 saylı internat məktəbinə verilmişdirlər. 18 yaşları tamam olanda Səməd və Elməddin internat məktəbindən məzun olublar. Bundan sonra hərbi xidmətə yollanan qardaşlar tərxis olandan sonra Bakıya qayıdıblar. Aylarla küçələrdə gecələyib, fəhləliklə məşğul olublar.
Hazırda 28 yaşları olan qardaşlar internat evində dostlaşdığı Saleh adlı şəxslə birgə kuryer kimi fəaliyyat göstərirlər. Gənclər 1 otaqlı, 1 çarpayılı, 1 pəncərəli, sanitar qovşağı olmayan evdə 100 manata kirayə yaşayırlar.
Qardaşlar kimsəsiz uşaqlar üçün tikilən evlərdən mənzil istəyirlər. Bunun üçün dəfələrlə aidiyyati üzrə qurumlara müraciət etsələr də, növbəyə düşə bilməyiblər. Mənzil almaq istəyən tək Elməddin və Səməd deyil. Hələ 9 yaşı olanda ailəsi tərəfindən internat evinə verilən Saleh də bunun arzusundadır. Salehin qalmağa yeri olmadığından işlədiyi yerdə gecələyir. Onun sözlərinə görə, dəfələrlə ev almaq üçün mənzil növbəsinə dayansa da, cəhdləri boşa çıxıb.
3 gəncin arzusu ilə bağlı müraciətə Əmək və Əhalinin Sosial Müdafiə Nazirliyinin tabeliyindəki Sosial Xidmətlər Agentliyinin departamentin rəhbəri Vügar Babakişiyev bildirdi ki, valideyn himayəsindən məhrum gənclərin məznillə təmin edilməsi üçün qeydiyyatda olduqları rayon icra hakimiyyəti (RİH) tərəfindən siyahıya alınmalı və nazirliyə təqdim edilməlidir. Sözügedən şəxslərin müraciətləri ilə bağlı nazirlikdə heç bir məlumat yoxdur.
Gənclərin qeydiyyatda olduğu Ağsu RİH-dən isə bildirildi ki, həmin vətəndaşlar RİH-yə müraciət edəndən sonra onlar ev növbəsinə götürüləcək və problemləri həll olunacaq.
