YARAT Müasir İncəsənət Məkanında Nyu-Yorkda yaşayan kinorejissor Zeke Ramazan Qeysin 2 günlük seminarı keçiriləcək. Bu haqda BakuPlus.az bu gün, 30 sentyabr tarixində xəbər verir.
Zeke Qeys Bakıda anadan olub, hal-hazırda Nyu-Yorkda yaşayır və kinorejissorluq fəaliyyəti ilə məşğul olur. Bruklin Kollecində film istehsalı üzrə bakalavr dərəcəsini alıb. O, bir sıra qısametrajlı filmlərin rejissoru və prodüseridir. Habelə ABŞ-nin bir sıra universitetlərində videomontaj və film istehsalı üzrə tədris fəaliyyəti təcrübəsinə malikdir. Əsas müəllimlik fəaliyyəti isə "Manhattan Youth" şirkəti ilə bağlıdır, burada onun tələbələri Tribeca Film Festivalının iştirakçıları olublar.
11, 12 oktyabr tarixilərində keçiriləcək seminarın proqramı:
1-ci gün:
Ssenari yazma bacarığı
Hekayələrin nədən ibarət olduğunu, necə və nə üçün yazıldığını təhlil etməyə, ssenari strukturunu anlamağa və onu əsas komponentlərə bölməyə çalışacağıq. Seminar zamanı bir neçə qısametrajlı filmi izləyib, onları təhlil edəcəyik, daha sonra iştirakçılar qrup şəklində öz ssenarilərini yazacaqlar.
2-ci gün:
Kinotənqid
İştirakçılarla birlikdə Hollivudun çiçəklənmə dövründə yaradılmış Uilyam Fridkinin məşhur "İblisi qovan" ("The Exorcist", 1973) filmini təhlil edəcəyik.
15 yaşdan yuxarı olan və iştirak etmək istəyənlər üçün qeydiyyat mütləqdir.
Seminar ingilis dilində, Azərbaycan dilinə sinxron tərcümə ilə baş tutacaq.
Yarat Mərkəzinin 2-ci mərtəbəsində keçiriləcək seminarlar saat 19:00-da başlayacaq və 2 saat davam edəcək.
