“Pişik Günel” ləqəbi ilə tanınan müğənni Günel Ələkbərova təhdid edildiyini bildirib.
Bakuplus.az xəbər verir ki, o, bu barədə şəxsi sosial şəbəkə hesabında məlumat verib.
Müğənni polisə müraciət edərək yardım istəyib:
“Tanımadığım birindən şəxsi nömrəmə zəng gəldi və özünü həkim Səadət Əliyevanın nişanlısı kimi təqdim edən Cavid adlı şəxs tərəfindən təhdid olundum. Hədə-qorxuya məruz qaldığım üçün Azərbaycan Respublikasının daxili işlər naziri Vilayət Eyvazova özümün və azyaşlı qızımın təhlükəsizliyinin təmin olunması üçün müraciət edirəm”.
İfaçının sözlərinə görə, təhdidə məruz qalmağının səbəbi 2 il əvvəl həkim Səadət Əliyevanın anasını uğursuz əməliyyat etməsidir:
“Təhdidlərə məruz qalmağımın səbəbi isə 2 il əvvəl həkim Səadət Əliyevanın "Mayomed" klinikasında səhhətində ciddi problem olan 65 yaşlı anamı uğursuz əməliyyat etməsidir. Yerli keyitmə ilə 10 saat əməliyyat olunmuşdu. Hazırda anamın üzündə ciddi problemlər mövcuddur. Üzündə deformasiya var. O xanım nömrələrini də dəyişir. Ona görə də klinika ilə əlaqə saxladıq. Həmin həkimin artıq orada işləmədiyini dedilər. Amma bu, belə deyil. O, başqa klinikalarda da çalışır. Bəlkə də onlarla belə insan var ki, üzləri bərbad hala düşür. Narazılıq bildirdikdə isə təhdid olunurlar”, - Günel bildirib.
Müğənni həmçinin Səhiyyə Nazirliyinə və TƏBİB-ə müraciət edərək sözügedən həkimin tibbi savadının araşdırılmasını istəyib.
