Azərbaycan Respublikasının Prezidenti İlham Əliyev Bakının Binəqədi rayonunda inşa edilən 335 nömrəli tam orta məktəbin açılışında iştirak edib. Bu haqda bu gün, 10 sentyabr tarixində Bakuplus.az Azərbaycan Respublikası Prezidentinin rəsmi saytına istinadən məlumat verir.
1600 şagird yeri olan məktəbdə 63 sinif otağı, 4 kompüter otağı, 2 məktəbəqədər hazırlıq otağı, 5 STEAM otağı, 2 idman zalı, ibtidai hərbi hazırlıq kabinetləri, xarici dil, musiqi, rəsm, fizika, kimya, biologiya otaqları, tibb məntəqəsi, kitabxana, 200 yerlik yeməkxana və 520 yerlik akt zalı mövcuddur. Dördmərtəbəli binanın ümumi sahəsi 17.254 kvadratmetrdir.
Prezident İlham Əliyev bu təhsil ocağının məktəbəhazırlıq qrupunda yaradılan şəraitlə, ibtidai hərbi hazırlıq, fizika, informatika kabinetləri, kitabxana, idman zalı, kimya laboratoriyası, yeməkxana, STEAM sinif otaqları ilə tanış olub.
2019-2020-ci tədris ilinin əvvəlindən məktəblərimizdə STEAM layihəsi birinci xanım Mehriban Əliyevanın təşəbbüsü ilə tətbiq edilir. Təcrübəli fəaliyyətlər vasitəsilə STEAM təhsili tələbələrə elmi və texniki bilikləri gündəlik həyatda tətbiq etməklə yanaşı, həm də mühəndislik bacarıqlarını mənimsəməyə kömək edir.
