Bakıda “Qardaşlıq Dastanı” Teatral Rəqs Nümayişi layihəsi keçiriləcək. Bu haqda BakuPlus.az Mədəniyyət Nazirliyinin mətbuat xidmətinə istinadən bu gün, 31 avqust tarixində xəbər verir.
Layihə Azərbaycan Respublikası Mədəniyyət Nazirliyi və Yunus Emre İnstitutunun Bakıdakı filialının dəstəyi ilə baş tutacaq.
Tədbir 29, 30 və 31 oktyabr tarixlərində Bakıda, Heydər Əliyev Sarayında keçiriləcək.
6 illik araşdırma və 18 aylıq səhnə məşqlərindən sonra hazırlanan nümayişdə 100-dən çox türkiyəli və azərbaycanlı rəqqas və teatr aktyoru iştirak edir.
Əsərdə eramızdan 2000 il öncə qədim türk, Azərbaycan tarixi və mifologiyası, Nuh tufanından Qarabağ savaşına qədər Anadolu və Qafqaz xalqlarının amansız mübarizəsi, həmrəyliyi, həyat sevgisi, sevinc və kədəri, bir sözlə, Azərbaycan və Türkiyə xalqlarının sarsılmaz qardaşlığı simvolik olaraq səhnəyə gətirilmişdir.
2022-ci ildə dünya turuna çıxacaq ansamblın ilk dayanacağı Azərbaycan səhnəsi olacaq.
Ansambl turlarını Almaniya, Şimali Avropa, Meksika, Özbəkistan, Qazaxıstan, Dubay, Misir, Qətər və Çində növbəti ilin sonuna qədər davam etdirəcək.
