Binəqədi rayonu, Rəsulzadə qəsəbəsinin keçmiş Stroydetal küçəsinin rəsmi adı ləğv edilsə də, heç vaxt yenisi ilə əvəz olunmayıb. Lakin küçə adı ilə yanaşı, burada yaşayan sakinlər daha 3 problemdən danışıblar. Bu haqda bu gün, 20 dekabr tarixində Real TV məlumat verib.
İlk problem qəsəbəni əhatə edən qamışlıq ərazinin zibilxanaya çevrilməsidir. Sakinlərin sözlərinə görə, buranın əsl zibil poliqonuna çevrilməsində yük maşınları ilə tullantıları bu sahəyə tökənlərin rolu böyükdür. Üst-üstə yığılan tullantılar zamanla zərərli həşəratların, gəmiricilərin, ilanların yuvasına çevrilib.
Sakinlərin üz-üzə qaldığı digər problem yağışlı havalarda onları çətinə salan yollardır. Şikayətçilərin sözlərinə görə, təxminən 10 ay öncə su və kanalizasiya xəttində boru təmiri işləri aparılarkən yollar bu hala düşüb. Üstəlik yolayrıcının çökək olması burada böyük gölməçənin meydana gəlməsinə səbəb olur.
Daha bir problem - kanalizasiya xəttinin olmamasıdır. Qəsəbəni əhatə edən qamışlıq zibillərin, digər tərəfdən isə kanalizasiya sularının anbarına çevrilib. Dayanmadan çirkab suların axıdılması dəhşətli üfunətə səbəb olur.
Hər 3 problemlə bağlı aidiyyəti üzrə qurumlar açıqlama verib. Məişət tullantıları ilə bağlı rəsmi açıqlamada bildirildi ki, qeyd olunan ərazidə zibillərin atılması üçün qutular mövcuddur. Lakin həmin ərazidə yaşayan bəzi sakinlər tərəfindən məişət tullantıları əksər hallarda zibil qutularına deyil, ərazidən keçən magistral neft kəmərinin ətrafına atılır. Neft kəmərlərinin keçdiyi ərazilərin mühafizə zonalarına atılan müxtəlif növ tullantıların təmizlənməsi məqsədilə müvafiq qurumlara müraciət edilib. Həmçinin bildirilib ki, sözügedən ərazidə təmizlik işlərinin yerinə yetirilməsi üçün lazım olan bütün şəraitlər yaradılacaq.
Kanalizasiya problemi ilə bağlı “Azərsu” ASC-nin rəsmisi Anar Cəbrayıllı bildirdi ki, həmin ərazidə mərkəzləşdirilmiş kanalizasiya infrastrukturunun olmadığından xəbərdardırlar. O, həmçinin əlavə etdi ki, Abşeron yarımadasının master planına uyğun olaraq, ilkin araşdırma işləri aparılıb və gələcəkdə mərkəzləşdirilmiş infrastruktur yaradılacaq.
Küçənin asfalt problemi ilə bağlı isə Anar Cəbrayıllı araşdırma apararaq bildirdi ki, sözügedən ünvanda “Azərsu” ASC tərəfindən heç bir bərpa işi görülməyib. Ona görə yolların təmiri ilə bağlı qurum heç bir məsuliyyət daşımır. Məhz bu səbəbdən sakinlər məsələnin həllinə görə digər qurumlara müraciət etməlidirlər.
[caption id="attachment_83907" align="alignnone" width="640"]
Foto Real TV rəsmi Youtube kanalı[/caption]
