Paytaxtın Səbail rayonunda tikiləcəyi gözlənilən metro stansiya illərdir planda qalıb. Bu haqda 8 sentyabr tarixində Transport for Baku məlumat verib.
Nəqliyyat eksperti Elməddin Muradlı bildirib ki, metro inkişaf edə bilmir:
“İctimai nəqliyyatın inkişafı dedikdə əsas diqqət metroya yönəlir. Yollardakı tıxaclar səbəbindən avtobuslar normal hərəkət edə bilmir. Hazırda ən əlverişli ictimai nəqliyyat növü metrodur. Dünya təcrübəsinə baxsaq, elə kiçik dövlətlər var ki, ildə iki stansiya tikirlər. Bizdə isə metronun inkişaf planı yoxdur”.
Onun sözlərinə görə "İçərişəhər" stansiyasından 20-ci sahəyə xəttin çəkilməsi illərdir plandadır, amma bu günə kimi icra olunmayıb.
“Hər gün Dövlət Bayrağı Meydanından “Azneft” meydanına qədər dəhşətli tıxac olur. Bayıl, 20-ci sahə, Qaradağ sakinləri nə vaxta qədər əziyyət çəkəcəklər? Metro ən azı 50 illik plan üzrə işləməlidir, lakin plan yoxdur. Metro inkişaf etmir, əksinə, dövlət büdcəsinə ziyan vurur”, - deyə Elməddin Muradlı əlavə edib.2010-cı ildə Bakı Metropoliteni Prezident İlham Əliyev ilə görüş zamanı inkişaf planını təqdim etmişdir. "Bakı Metropoliteni Xətlərinin Konseptual İnkişaf Sxemi"nə uyğun olaraq gələcəkdə Bakı metropoliteninin ümumi şəbəkəsi 2 mövcud və 3 əlavə yeni xətt olmaqla 5 xəttdən, 76 stansiyadan və 120,1 km uzunluğunda metro xəttindən ibarət olacaq. Yəni 53 yeni stansiya və 84,3 km metro xətlərinin inşası nəzərdə tutulub.
