Paytaxtın Səbail rayonu, 2-ci Bibiheybət döngəsi adlanan küçədə sakinlər asfaltsız yollardan narazıdırlar. Bu haqda bu gün, 26 oktyabr tarixində Bakuplus.az Real TV-yə istinadən xəbər verir.
500-dən çox ailə 25 ildir kələ-kötür, quyulu yollarla hərəkət etməyə məcburdurlar. Burada yağış yağan kimi hər yer gölməçə və palçıq olur.
“Təcili tibbi yardım və taksi buralara gəlmir. Uşaqlar məktəbə gedə bilmirlər. Rəsmi qurumlar söz versələr də, hələ də bir iş görməyiblər”, - deyə sakinlər bildirirlər.
Səbail rayon İcra Hakimiyyəti məsələ ilə bağlı bildirir ki, sözügedən küçənin təmiri üçün Avtomobil Yolları Dövlət Agentliyinə müraciət olunub və əgər təsdiq olunarsa, yenidənqurma işlərinə başlanılacaq.
