Sabah, 15 sentyabr tarixində ölkə ərazisində fəaliyyət göstərən məktəblərdə Bilik Günü qeyd edilməyəcək. Bu haqda bu gün, 14 sentyabr tarixində Elm və Təhsil Nazirliyinin mətbuat xidməti məlumat verib.
Buna səbəb Ermənistan silahlı qüvvələrinin Azərbaycan-Ermənistan dövlət sərhədi istiqamətində genişmiqyaslı törədilən təxribat nəticəsində Ordumuzun itkilər verməsidir.
Təhsil müəssisələrində Dövlət Himni səsləndiriləcək, şəhidlərimizin ruhu yad ediləcək. Bəzəklərdən və musiqidən istifadə olunmayacaq.
Sentyabrın 12-si gecə və sentyabrın 13-ü səhər saatlarında Ermənistan silahlı qüvvələri Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədib. Təxribatın qarşısı alınarkən ümumilikdə Silahlı Qüvvələrin 50 hərbi qulluqçusu, o cümlədən Azərbaycan Ordusunun 42, Dövlət Sərhəd Xidmətinin 8 hərbi qulluqçusu şəhid olub.
