Əmək və Əhalinin Sosial Müdafiəsi Nazirliyi yanında Sosial Xidmətlər Agentliyi şəhid Səbuhi Əhmədovla bağlı sosial şəbəkələrdə yayılan açıqlamaya aydınlıq gətirib. Bu haqda bu gün, 29 sentyabr tarixində qurumun mətbuat katibi Murad Həşimov öz Facebook səhifəsində paylaşım edib.
O, bildirib ki, bu sənəd “Şəhid”in və şəhid ailəsinin statusunu müəyyən edən şablon arayış blankıdır.
“Göründüyüz kimi bu arayışda şəhidimizin hər hansı bir ailə üzvü barədə məlumat yazılmayıb.
Şəhidin ailə üzvü kimi rəsmi statusun tanınması “Şəhid adının əbədiləşdirilməsi və şəhid ailələrinə edilən güzəştlər haqqında” Qanuna uyğun olaraq həyata keçirilir.
Qanunvericilikdə bu güzəştlərdən şəhidin:
- həyat yoldaşı;
- valideynləri;
- 18 yaşına çatanadək (əyani təhsil aldığı halda 23 yaşınadək) uşaqları;
- 18 yaşına çatanadək əlilliyi müəyyən olunmuş 18 yaşından yuxarı əlilliyi olan övladları;
- 18 yaşına çatanadək (əyani təhsil aldığı halda 23 yaşınadək) uşaq evlərində tərbiyə olunan qardaş və bacıları;
- qanunla onları saxlayan şəxs olmadıqda baba və nənələri istifadə edir”, - Həşimov aydınlıq gətirib.
Beləliklə, şəhidin qardaşı Sənan 27 yaşı olduğu üçün qeyd olunan qanunvericiliyə uyğun olaraq imtiyazlı şəxs sayılmır.
Buna baxmayaraq, Sənan Əhmədova sosial-məişət şəraitinin yaxşılaşdırılması üçün hazırkı təklifi - sosial tərəfdaş vasitəsilə təqdim olunan 1 otaqlı mənzili təklif edir.
“Biz bu mövzunu kontekstdən çıxarmaq, yanlış mövqedən yaymaq, şəhid adının müqəddəsliyini, dövlətin şəhid ailələrinə qayğısını ört-basdır etmək cəhdlərini pisləyirik”, - deyə o vurğulayıb.
