Paytaxtın Binəqədi rayonu, Sulutəpə qəsəbəsinin sakinləri kanalizasiyanın olmamasından və çirkab qoxusundan əziyyət çəkirlər. Bu haqda bu gün, 19 sentyabr tarixində Bakuplus.az Space TV-yə istinadən məlumat verir.
Qəsəbənin Xələfli küçəsinin sakinləri uzun illərdir ki, pis qoxuya dözməli olublar. Kanalizasiyanın olmaması burada antisanitar vəziyyətin yaranmasına səbəb olub. Günəşli günlərdə kanalizasiya qoxusundan, yağışlı günlərdə gölməçələrdən bezən sakinlər nə edəcəklərini bilmirlər.
Sakinlər problemlə bağlı aidiyyəti qurumlara müraciət etdiklərini də deyirlər. Lakin heç bir cavab almayıblar.
Məsələ ilə bağlı “Azərsu” ASC-dən bildirilib ki, kəndin mərkəzləşdirilmiş kanalizasiya infrastrukturu yaradılmayıb. Mövcud xətlər vətəndaşlar tərəfindən fərdi qaydada çəkilib və tikinti normalarına uyğun deyil. Layihənin 2022-ci ildə həyata keçirilməsi nəzərdə tutulmayıb və baş plana uyğun olaraq gələcəkdə yaradılması planlaşdırılır.
[caption id="attachment_70481" align="alignnone" width="640"]
Foto Space Tv-nin rəsmi Youtube kanalı[/caption]
