Suraxanı rayonunda yağış yağan kimi sakinlərin küçələrini və evlərini su basır. Bu haqda 12 noyabr tarixində APATV məlumat verib.
Qaraçuxur qəsəbəsi, Şərq yaşayış massivi 16, 17 və 18-ci döngələrdə yaşayan sakinlər iddia edirlər ki, yağış yağan kimi hər yeri su basır. Sakinlərin həyat şəraitini çətinləşdirən isə yeraltı su borularının köhnə və həcmcə kiçik olmasıdır. Bu səbəbdən onlar tutulur və yağış yağar-yağmaz lükdən daşmaqla yanaşı, eyni zamanda bəzi yerlərdən də partlayır.
Sakinlər bildirirlər ki, ərazidə olan 816 nömrəli nasosxana da normal işləmir. Yağışdan sonra zirzəmilərə dolan qrunt sularının çəkilməsi prosesini sakinlər öz vəsaitləri hesabına həyata keçirirlər.
Adıçəkilən nasosxananın əməkdaşı olan Müşfiq Abbasov məsələ ilə bağlı öz münasibətini bildirib:
“Mərkəzi borunun içi təmizlənməlidir, onun bizim nasosxanaya aidiyyəti yoxdur. Bunu da “Azərsu”ASC etməlidir. Kanalizasiyamız yoxdur, ayaqlarımız da ağrıyır”.
“Azərsu” ASC əməkdaşı Anar Cəbrayıllı məsələnin həll ediləcyini bildirdi:
“Həmin ərazidə mərkəzləşdirilmiş kanalizasiya sistemi yoxdur. Qurulan xətlər də vətəndaşlar tərəfindən primitiv qaydada yaradılan xətlərdir. Yağış sularının daşınması üçün heç bir kollektor xətti mövcud deyil. Elə buna görə də yağış yağan zaman yuxarıda toplanan sular bu əraziyə axır. Bu ərazidə mərkəzləşdirilmiş şəbəkənin qurulması ilə yağış və tullantı sularını daşınmasında yaranan problemlər tam aradan qaldırılacaq”.
