Bakı İdman Sarayında 24 sentyabr - 1 oktyabr tarixlərində Milli Kitab Sərgisi keçiriləcək. Bu haqda bu gün, 12 sentyabr tarixində Bakuplus.az məlumat verir.
Tədbirin təşkilatçısı “Qanun” nəşriyyatının verdiyi məlumata görə, burada nəşriyyat və poliqrafiya şirkətləri ilə yanaşı, ticarət və yayım müəssisələri, yaradıcı təşkilatlar, müstəqil yazarlar, eləcə də sənətkarlar və fiziki məhdudiyyətli şəxslər iştirak edə biləcəklər.
Həftə ərzində oxucular və tamaşaçılar sənət adamları ilə müxtəlif görüşlərdə, oxu saatlarında, imza günlərində, şeir gecələrində, musiqi proqramlarında iştirak edə biləcəklər.
Həmçinin yazıçılıq, kitab nəşri, kitab dizaynı, tərcümə və redaktə mövzularında canlı müzakirə panelləri təşkil olunacaq. Burada nəşr tarixindən, janrından və oxucu kateqoriyasından asılı olmayaraq, istənilən kitabı tapıb əldə etmək mümkün olacaq.
