“Torqovaya”da ərəb turistlə gəzən qadın cərimələnib. Bu haqda 20 sentyabr tarixində Kriminalqafqaz məlumat verib.
Bu ilin may ayında şəhərin mərkəzində ərəb turistlə gəzdiyi üçün cərimələnən Ayan Məmmədova (ad və soyad şərtidir) barəsində çıxarılmış qərardan apellyasiya şikayəti verib.
"Axşam saat 23:42 radələrində Nizami küçəsində mən, bacım və bir nəfər əcnəbi şəxs gəzirdik. Biz əslində ona bələdçilik edirdik. Bu zaman Post-Patrul Xidmətinin əməkdaşları üstümüzə hücum çəkərək bizi məcburi şəkildə polis bölməsinə apardılar. Bölmədə bizə bildirdilər ki, 10 gündür qərar qəbul olunub ki, küçədə ərəblə gəzmək qadağandır, rəisin təlimatına əsasən, ərəblə gəzən hər kəsi tuturlar. Bu mənim şəxsiyyətimi alçaltmaq məqsədilə atılan qanunsuz addımdır. Mən ingilis dilini bilirəm, müvafiq sertifikatım da var və uzun müddətdir ki, bələdçilik və tərcüməçiliklə məşğul oluram. Haqqımda çıxarılan qərar saxtadır”, - deyə şikayətçi bildirib.
Səbail Məhkəməsi A.Məmmədova barəsində İnzibati Xətalar
Məcəlləsinin “Fahişəliklə məşğul olma” maddəsi ilə yazılmış protokolu təmin edib və o, 100 manat cərimə olunub. Bakı Apellyasiya Məhkəməsi də qərarın əsaslı olduğu qənaətinə gələrək, A.Məmmədovanın şikayətini təmin etməyib.
