“Torqovaya”da fəaliyyət göstərən animator “siçan” saxlanılıb. Bu haqda 29 sentyabr tarixində Qafqazinfo.az məlumat verib.
Sentyabrın 21-də axşam saatlarında Nizami küçəsində uşaqlarla fotolar çəkdirib pul yığan siçan geyimindəki 33 yaşlı şəxsə polislər yaxınlaşıblar və onun qeyri-qanuni fəaliyyət göstərdiyini bildiriblər. Lakin o, polisə müqavimət göstərib, fəaliyyətini davam etdirəcəyini bildirib və polis əməkdaşlarını söyməyə başlayıb. Bundan sonra həmin şəxs polis bölməsinə aparılıb və onun barəsində tərtib edilmiş protokolla birgə Səbail Rayon Məhkəməsinə göndərilib. Məhkəmənin qərarı ilə o, 200 manat cərimə edilərək sərbəst buraxılıb.
Saxlanılan şəxs məhkəmədə ifadə verib:
“Nizami küçəsində qanunsuz fəaliyyət göstərərək, yəni “siçan” paltarı geyinərək, pul yığırdım. Başqa əmək məşğuliyyətim yoxdur, buradan əldə etdiyim pulla ailəmi dolandırıram, iki azyaşlı uşağım var. Polis əməkdaşları yaxınlaşaraq irad bildirdilər, mənə bu işi davam etdirməməyi tapşırdılar. Lakin iradlara məhəl qoymayaraq işimi davam etdirəcəyimi söylədim. Polis məni saxlayıb bölməyə apardı. Əməlimdən peşmanam”.
