Şuşa Dövlət Musiqili Dram Teatrında Hüseyn Cavidin “Ana” mənzum dramı nümayiş olunacaq. Bu haqda 24 sentyabr tarixində Bakuplus.az məlumat verir.
“Ana” mənzum dramı sentyabrın 24-də göstəriləcək. Səhnə əsərinin quruluşçu rejissoru, Əməkdar artist Loğman Kərimov, quruluşçu rəssamı Valeh Məmmədovdur. Əsər Hüseyn Cavidin 140 illik yubileyi və 2022-ci ilin “Şuşa İli” elan olunması ilə əlaqədar teatrın cari repertuarına daxil edilib.
Xeyirlə şərin mübarizəsini təsvir edən mənzum dramında Səlma ananın timsalında ümumbəşəri dəyərlərə malik bir qadın obrazı yaradıb. Ana evinə qəbul etdiyi qonağın oğlunun qatili olduğunu bilincə nə qədər sarsılsa da, “Qonaq Allah qonağıdır”, “Qonağa zaval yoxdur” düşüncəsi ilə dözümlülük və mətanət göstərir. Əsər faciəvi bir sonluqla bitsə də, Səlma ananın möhtəşəm obrazı xarakter baxımından yaddaşlarda dərin iz buraxır.
Cavidin ilk dram əsəri “Ana” olub. Daha çox mənzum faciə kimi qəbul edilən əsər 1910-cu ildə qələmə alınıb və ilk dəfə 1913-cü ildə Tiflisdə “Gürcü şirkəti” mətbəəsində kitabça şəklində işıq üzü görüb.
[URIS id=71184]
