Paytaxtın Xətai rayonunda 9 mərtəbəli binanın lifti uzun müddətdir işləmir. Bu haqda bu gün, 11 yanvar tarixində Bakuplus.az ATV-yə istinadən xəbər verir.
Rayonun Seyid Əzim Şirvani, 12 ünvanında yerləşən binaya 5 il öncə təzə lift quraşdırılıb. Ancaq lift tez-tez xarab olur, uzun müddət işləmir. Sakinlər də bu vəziyyətdən narahat olurlar. Əsasən də yuxarı mərtəbələrdə yaşayanlar çətinlik çəkirlər.
“Düzəldirlər, 3-5 gün işləyir, dayanır. Elə vaxt olub ki, düzəldiblər, 1 saatdan sonra yenə xarab olub. Binada yaşlı qadınlar yaşayırlar, onlar düşüb-qalxa bilmirlər. Məcbur qonşulara mağazadan nəsə almaq üçün müraciət edirlər”, - deyə sakinlər bildirirlər.
Lift Təmir-İstehsalat Birliyinin baş mühəndisi məsələ ilə bağlı bildirib ki, sakinlər liftdən düzgün istifadə etmirlər. Belə ki, onlar liftin qapısını açıq saxlayırlar, icazə olunandan artıq yük qoyurlar. Bu da liftin ömrünü xeyli azaldır.
Sözügedən binada lift problemi uzun müddətdir aktualdır. Belə ki, Bakuplus.az ötən ilin mart ayında da eyni məsələni işıqlandırmışdı.
