Bakıda tarixi abidəyə müdaxilə edənlər cərimələniblər. Bu haqda 13 sentyabr tarixində APA məlumat verib.
Bakının mərkəzində, Qoqol küçəsində yerləşən 19-cu əsrdə tikilmiş binanın fasadı zədələnmişdir. Bir il əvvəl Azərbaycan hökuməti tərəfindən bərpa edilmiş və dövlət tərəfindən qorunan tarixi binanın fasadını restoran düzəltmək üçün “kəsmişdirlər”.
XIX əsrə aid tarixi abidənin fasadına müdaxilələr olunması məsələsini Mədəniyyət Nazirliyi Yanında Mədəni İrsin Qorunması, İnkişafı və Bərpası üzrə Dövlət Xidməti nəzarətə götürüb. Qurumun əməkdaşı Nuridə Allahyarova bildirib ki, sözügedən abidənin fasadında, pəncərələrində edilən dəyişikliklər qanun pozuntusudur. Dövlət Xidməti məsələni aktlaşdırıb, cərimələr müəyyən olunub.
“Tarixi abidələrin restorana çevrilməsində qəbahət yoxdur. Çünki bu cür abidələr müəyyən icazələrdən sonra sahibkarlıq fəaliyyəti səbəbi ilə istifadə edilə bilər. Lakin burada birinci şərt abidənin ümumi tarixiliyinə zərər verilməməsidir. Olsa belə, bu, birbaşa Dövlət Xidmətinin mütəxəssislərinin rəyi və iştirakı ilə həyata keçirilə bilər”, - deyə Nuridə Allahyarova əlavə edib.
