Paytaxtın Yasamal rayonunda yerləşən 98 saylı körpələr evi - uşaq bağçasındakı qanunsuzluqlarla bağlı cinayət işi başlanıb. Bu haqda bu gün, 10 yanvar tarixində Azərbaycan Respublikası Baş Prokurorluğunun mətbuat xidməti məlumat verib.
Bağçada yol verilən qanunsuzluqlarla bağlı daxil olan müraciət əsasında rayon prokurorluğunda araşdırma aparılıb. Araşdırma zamanı körpələr evi - uşaq bağçasının müdirinin qəyyumluq vəzifəsindən istifadə edərək 2018-2022-ci illər ərzində külli miqdarda dövlət əmlakını mənimsəməsi, bağçada təhsil alan uşaqların valideynlərindən pul alması, faktiki olaraq işləməyən şəxslərə saxta əməkhaqqı verməsi barədə əsaslı şübhələr müəyyən edilib.
Faktla bağlı Yasamal Rayon Prokurorluğunda Cinayət Məcəlləsinin “Külli miqdarda mənimsəmə”, “Vəzifə səlahiyyətlərindən sui-istifadə”, “Vəzifə saxtakarlığı” maddələri üzrə cinayət işi açılıb.
