Bakı şəhəri, Yasamal rayonu, Müstəqillik küçəsi 55 ünvanında yerləşən MİDA-nın (Mənzil İnşaatı Dövlət Agentliyi) Yeni Yasamal yaşayış massivindəki binadakı keyfiyyətsizlik sakinlərin narazılığına səbəb olub.
Sakinlərin Bakuplus.az-a verdiyi məlumata görə, burada yaşayanlar artıq üç ilə yaxındır ki, müxtəlif texniki problemlərlə üzləşirlər. Mənzillərdə tez-tez su sızmaları baş verir, divar və tavanlarda çatlar yaranır, digər tikinti qüsurları müşahidə olunur.
“Bu evləri 20 illik ipoteka ilə almışıq. Amma hər ay ödəniş etdiyimiz mənzildə yaşamaq mümkün deyil. Bizim kimi burada şəhid ailələri, qazilər, hərbçilər, dövlət qulluqçuları da yaşayır. Belə çıxır ki, dövlətin etibar etdiyi insanlara qəzalı evlər satılıb”, – deyə sakinlərdən biri deyib.
Sakinlər bildirirlər ki, bu problemlərlə bağlı dəfələrlə aidiyyəti qurumlara müraciət etsələr də, müsbət nəticə olmayıb.
Onlar məsələ ilə bağlı dövlət orqanlarına çağırış edirlər:
“Xahiş edirik, bu məsələyə ciddi yanaşılsın. Mənzillərin vəziyyəti insanların təhlükəsizliyini risk altına alır. Bu haqsızlığın qarşısı alınmalıdır.”
Məsələ ilə bağlı MİDA-ya sorğu ünvanladıq. Qurumdan müraciətimizə hələlik heç bir cavab gəlməyib.
