Bu gün Xalq artisti Məmmədbağır Bağırzadənin vəfatından 21 il ötür.
Müğənni, bəstəkar M.Bağırzadə 1950-ci ildə Bakının Nardaran kəndində dünyaya gəlib. Onun sənət yolu toy və el şənliklərindən başlayıb. O, adətən, öz mahnılarını oxusa da, klassik, müasir bəstəkar və şairlərin yaradıcılığına müntəzəm müraciət edib.
Məmmədbağır Bağırzadəni televiziyaya gətirən və onun yaradıcılığında xüsusi rol oynayan bəstəkar Ələkbər Tağıyev olub. Müğənninin repertuarına Oqtay Kazımovun, Nəriman Məmmədovun, Tahir Əkbərin və digərlərinin mahnıları da daxil idi.
Sözləri və musiqisi Məmmədbağır Bağırzadəyə aid olan "Səməni nazlı gəlin", "Hülya", musiqisi Ələkbər Tağıyev, sözləri Hafiz Baxışa aid olan "Azərbaycan oğluyam" və digər nəğmələr bu gün də başqa ifaçılar tərəfindən səsləndirilməkdədir.
Azərbaycan musiqi tarixində özünəməxsus yeri olan Məmmədbağır Bağırzadə təkcə ifası ilə deyil, həyatında baş verən maraqlı və kədərli hadisələrlə də yadda qalıb.
Məmmədbağır Bağırzadənin efirlərə çıxışına bir müddət qadağa qoyulub. 1975-1976-cı illərdə ölkənin ən məşhur müğənnilərindən biri hesab olunan sənətkarın şöhrəti bəzi musiqi adamlarının narazılığına səbəb olub. Həmin dövrdə "Kirpi" jurnalında "Məmmədbağır, bir də bağır" başlıqlı yazılar dərc edilərək o, tənqid olunub.
Sənətkarın oğlunun sözlərinə görə, bu tənqidlərin arxasında o dövrün bədii şurası dayanıb. İddialara əsasən, Məmmədbağır Bağırzadənin toylarda oxuduğu mahnıların qısa müddətdə bütün ölkəyə, hətta İrana və Orta Asiya ölkələrinə yayılması onun şöhrətini daha da artırıb.
Bəstəkar Ələkbər Tağıyevlə də aralarında fikir ayrılığı yaranıb. Belə ki, Tağıyev Məmmədbağır Bağırzadəyə öz mahnılarını oxumağı təklif etsə də, sənətkar əvvəlcə bundan imtina edib. O, yalnız öz mahnılarını ifa etdiyini bildirib. Oğlunun danışdıqlarına görə, bundan sonra Ələkbər Tağıyev onun radio və televiziyada çıxış etməsinə mane olacağını deyib.
Məmmədbağır Bağırzadə oxuduğu mahnılara görə həbs də edilib. O, sosializmə zidd hesab edilən mahnılar ifa etdiyinə görə üç gün həbsdə saxlanılıb. Sənətkarı həbsdən Ələkbər Tağıyev xilas edib. 1977-ci ildən sonra Məmmədbağır Bağırzadə kişi toylarına getməyi dayandırıb, yalnız dost-tanış məclislərində çıxış edib. Bundan sonra onun efirlərə qayıtması mümkün olub.
Sənətkarın həyatı şəxsi itkilərlə də yadda qalıb. Həyat yoldaşı Naibə xanım 44 yaşında xərçəng xəstəliyindən vəfat edib. Onun ölümündən sonra Məmmədbağır Bağırzadə ağır psixoloji sarsıntı keçirib. Yaxınlarının sözlərinə görə, sənətkar həyat yoldaşının itkisini çox çətin qəbul edib, bəzən yaşamaq istəmədiyini də dilə gətirib.
Məmmədbağır Bağırzadənin həyatındakı ən qəribə məqamlardan biri isə ölümü ilə bağlı yuxusu olub. O, oktyabrın 30-da dünyasını dəyişəcəyini yuxuda görüb və bu tarixdən həmişə qorxub. Maraqlıdır ki, sənətkar məhz oktyabrın 30-u 2005-ci ildə vəfat edib.
Məmmədbağır Bağırzadə özünəməxsus ifa tərzi, sevilən mahnıları və keşməkeşli həyat yolu ilə Azərbaycan musiqi tarixində iz qoyub.
