Buraxılış və qəbul imtahanlarının keçirildiyi dövrdə yeniyetmələr arasında özünü öldürmə və özünü öldürməyə cəhd hallarını müşahidə edirik. Bu hallar təkcə bu il yox, hər il baş verir.
İstədiyi nəticəni göstərə bilməyən, valideynlərin gözləntilərini doğrultmayan, universitetə qəbul olmaq arzusu gözündə qalan gənc, üzləşdiyi uğursuzluqla barışmayıb yeganə çıxış yolu kimi intiharı seçir.
Bu çətin dönəmdə dəstək almaq əvəzinə, onlar ətraf insanların, ən çox da valideynlərin basqısına məruz qalırlar. “Əziyyət çəkdik, bu qədər pul tökdük, sən isə bizim gözləntilərimizi doğrultmadın”, “Hamının uşağı ali məktəbə qəbul oldu, sən isə imtahandan kəsildin”, "Qohumların yanında biabır olduq" kimi sözlər yeniyetmələri daha çətin duruma salır və nəticədə onlar vəziyyətdən yeganə çıxış yolu kimi intiharı seçirlər.
Yeniyetməlik dövrü “keçid”, “təhlükəli”,“dönüş” və s. dövrü adlandırılır. Həmin dövrdə oğlan və qızların fiziki və psixi inkişafında müxtəlif keyfiyyət dəyişiklikləri baş verir. Tədqiqatlar zamanı məlum olub ki, həyəcanlı, depressiv vəziyyətlər intihara gedən yolun başlanğıcıdır. Və bu dövrdə valideyn ilə övlad arasında yaranan boşluq, valideynlərin müntəzəm olaraq öz övladlarının psixoloji durumu ilə maraqlanmaması və valideyn tərəfindən yeniyetmədən aşırı istəklər onu depressiyaya salır.
Sualımız izləyicilərədir:
Bir kağız parçası, diplom övladın canından önəmlidir? Qohumların, tanışların gözündə yüksəlmək arzusunda olan valideynlər, uşağınız öləndə həmin insanlar sizə acıyacaqlar? - Onlar sadəcə “Allah rəhmət etsin” deyib evlərinə, öz övladlarının yanına qayıdacaqlar...
Uğursuz nəticə göstərən uşaqlara qarşı çox həssas davranmaq lazımdır - imtahanlar intiharlara səbəb olmamalıdır!
