Xətai rayonu, Zığ şosesi, 7-ci binanın zirzəmisi açıq vəziyyətdə olduğu üçün üfunət qoxusundan burada qalmaq mümkünsüzdür. Bu haqda bu gün, 16 dekabr tarixində Bakuplus.az ATV-yə istinadən məlumat verir.
İstismar müddətini başa vuran və təməli 60 il bundan əvvəl qoyulan binada hazırda 60 ailə yaşayır. Binanın daxilində də acınacaqlı vəziyyətdir. Divarlar uçmaq üzrədir, pilləkənlərin əksəriyyəti sıradan çıxıb. Elektrik naqilləri açıq vəziyyətdə olduğu halda tavandan su damır. Sakinlərin sözlərinə görə, bina hər an uça bilər.
Binanın aid olduğu 133 saylı Mənzil Kommunal İstismar Sahəsindən bildirildi ki, qəzalı binalarda yaşayanların mərhələli şəkildə köçürülməsi nəzərdə tutulur. Binanın vəziyyəti ilə əlaqədar aidiyyəti qurumlara müraciət olunub. Tikili pilot layihə olan binaların siyahısına salınmışdır.
