“Zerkalnı Əliyar”ın vəsiqəsi əlindən alınıb. Bu haqda 12 sentyabr tarixində Oxu.az məlumat verib.
Bakıda yol hərəkəti qaydalarını mütəmadi olaraq pozduğu üçün tez-tez gündəmə gələn 10-MM-100 dövlət qeydiyyat nişanlı “Toyota Prado” markalı avtomobilin sürücüsü 75-80 yaşlı Əliyar Dadaşovun sürücülük vəsiqəsinə məhdudiyyət qoyulub. O, son aylarda yol hərəkəti qaydalarını dəfələrlə pozub, digər hərəkət iştirakçıları üçün təhlükəli vəziyyətlər yaradıb.
Belə ki, Əliyar Dadaşovun bir neçə ay ərzində 20 ballıq qayda pozuntuları aktlaşdırılıb və İnzibati Xətalar Məcəlləsinin 529.3-cü maddəsi əsasında bu gün onun vəsiqəsinə bir il müddətinə məhdudiyyət tətbiq edilib.
Mövcud qanunvericiliyə əsasən, bu kimi hallarda sürücü təyin edilmiş qadağa müddəti başa çatandan sonra yenidən təcrübi imtahan verərək nəqliyyat vasitəsini idarə etmək hüququ verən sənədi əldə edə bilər.
