Yasamalda yerləşən "Zeytun-469" adlı aptekdə qeydiyyatsız dərman satışına görə açılan cinayət işi üzrə məhkəmə prosesi başa çatıb. Bu haqda bu gün, 10 yanvar tarixində Bakuplus.az Qafqazinfo-ya istinadən məlumat verir.
Yasamal Rayon Məhkəməsində baxılan işin araşdırmaları zamanı məlum olub ki, aptekdə işləyən ixtisasca həkim olan Yusif Qədirov (şərti) Azərbaycanda qeydiyyatdan keçirilməmiş dərman vasitələrinin pərakəndə satışı ilə məşğul olub.
Baş Mütəşəkkil Cinayətkarlıqla Mübarizə İdarəsinin (BMCMİ) əməkdaşları aptekdə "Xarelto", “Femara Novartis", “Estrofem", “Anti-asidoz" və “Proluton" kimi dərmanların satıldığını aşkar ediblər. Aptekdə keçirilmiş əməliyyat-axtarış tədbiri nəticəsində dövlət qeydiyyatından keçirilməmiş “Paxil", “Ventolin", "Janumet", “Triplixam”, "Forziga", “Rytmonorm", “Kardura", “Devit-3", "Estrofem", "Norvasc", "Dideral", “Cialis", "Viagra", “Kestine", “Zirtek", "İsoptin" markalı dərman vasitələri aşkar edilib.
Satıcı aptekdə idarəedici işlərə baxdığını, ittiham üzrə özünü təqsirli bilmədiyini deyib. O, qeydiyyatsız dərmanların “Zeytun” və “Binə depo” şirkətlərinə məxsus olduğunu bildirib.
Qədirov təqsirli bilinərək 3000 manat cərimə olunub. Müsadirə olunmuş dərmanlar isə dövlət nəfinə keçirilib.
