Martın 10-dan 13-dək Bakıdakı Milli Gimnastika Arenasında akrobatika gimnastikası üzrə Dünya Çempionatı keçiriləcək. Bu haqda Azərbaycan Gimnastika Federasiyasının mətbuat xidməti məlumat yayıb.
Yarışda, qeydiyyatdan keçmiş ölkələrin siyahısına əsasən, 17 ölkədən 170 gimnast öz çıxışlarını nümayiş etdirəcək.
Yarışların 4 günü ərzində gimnastlar kişi cütlüklərində, qadın cütlüklərində, qarışıq cütlərdə, kişi qruplarında, qadın qruplarında tarazlıq, temp və kombinə edilmiş hərəkətlərdə mübarizə aparacaqlar.
Bu çempionatda ölkəmizi yeniyetmələr arasında Avropa çempionları - Daniel Abbasov və Murad Rəfiyev, beynəlxalq turnirlərin qalibləri - Sabir Ağayev və Mehriban Salamova, böyüklər arasında Avropa çempionatının gümüş və bürünc mükafatçıları - Ağasif Rəhimov və Raziyyə Seyidli təmsil edəcəklər.
Daha öncə, bu ilin 3-6 mart tarixlərində Bakı, akrobatika gimnastikası üzrə 12-ci Dünya Yaş Qrupu yarışlarına ev sahibliyi etmişdir.
