Bir yaşlı oğluna xəsarət yetirən şəxs məhkəmədə ifadə verib. Bu haqda 24 sentyabr tarixində APA məlumat verib.
Bakıda 1 yaşlı oğluna ağır xəsarət yetirən Samir Ağakərimovun cinayət işi ilə bağlı məhkəmə prosesi keçirilib və o, keçirilən iclasda ifadə verib. Ağakərimov ifadəsində hadisə baş verən zaman narkotikin təsiri altında olduğunu və həyat yoldaşı ilə qısqanclıq zəminində aralarında mübahisə düşdüyünü deyib, lakin oğluna xəsarət yetirdiyini xatırlamadığını bildirib:
"Hadisə günü psixotrop maddə qəbul etmişdim və yadıma gəlir ki, ev əşyalarına görə yoldaşımla mübahisə etdik. Ola bilər ki, həmin əsnada uşağı döşəyin üstünə atmışam, amma yerə möhkəm çırpmağımı xatırlamıram".
Hadisə Yasamal rayonu, Xaqani Dadaşov küçəsində aprelin 26-sında baş verib. 30 yaşlı Samir Ağakərimov 11 aylıq körpəni evdən küçəyə atıb, qonşular uşağı əlindən almaq istəyərkən, onu qəsdən yerə çırpıb. Zərbə nəticəsində uşaq ağır kəllə-beyin travması alıb və Respublika Neyrocərrahiyyə Xəstəxanasına yerləşdirilib. Uşaq travma aldığı üçün gözləri çəpləşib, kəllə sümüyündə 4 yerdə sınıq əmələ gəlib və beyninə qan sızıb.
Samir Ağakərimov CM-in “Xüsusi amansızlıqla və ya ümumi təhlükəli üsulla adam öldürməyə cəhd” maddəsi ilə ittiham olunur.
